விஜய் சேதுபதி ஜோடியா திரிஷா நடிக்கலை - நலன் குமாரசாமி!

சூதுகவ்வும் திரைப்படத்தின் மூலம் தமிழ்த் திரையுலகிற்கு அதிரடி நகைச்சுவை இயக்குனராகக் களமிறங்கியவர் நலன் குமாரசாமி. அறிமுகப் படமே மாபெரும் வெற்றியைப் பெற்றுத் தந்ததால் இவரது அடுத்த படத்தினை ஆவலுடன் எதிர்பார்த்துக் காத்திருக்கின்றனர் ரசிகர்கள்.

கடந்த சில மாதங்களுக்கு முன்னர் எஸ்கிமோ காதல் என்று தலைப்பிடப்பட்ட கதையினை உருவாக்கிவருவதாகவும், விஜய் சேதுபதி இப்படத்தில்
நடிக்கவுள்ளதாகவும் கூறப்பட்டது. மேலும் இப்படத்தில் விஜய் சேதுபதியின் ஜோடியாக திரிஷா நடிக்கவுள்ளதாகவும் தகவல்கள் வெளியாகியிருந்தன.

எஸ்கிமோ காதல் திரைப்படத்தில் விஜய் சேதுபதியின் ஜோடியாக திரிஷா நடிப்பது குறித்து வந்திருக்கும் செய்திகள் அனைத்தும் முற்றிலும் வதந்தி என்றும், இப்படத்தில் நடிப்பதற்காக திரிஷாவை நாங்கள் யோசிக்கவே இல்லை என்றும் தெளிவுபடுத்தியுள்ளார் இயக்குனர் நலன் குமாரசாமி. விஜய் சேதுபதி நடிக்கவுள்ள இத்திரைப்படத்தின் படப்பிடிப்புக்கள் அடுத்த ஆண்டு துவங்கவுள்ளதாகவும் தெரிவித்துள்ளார்.