Thursday, May 22, 2014

அனிருத் இசையில், தனுஷ் எழுத்தில் விஜய் பாடும் பாடல்!

ஐங்கரன் தயாரிப்பு நிறுவனமும், லைகா புரொடக்ஷனும் இணைந்து தயாரிக்கும் படம் 'கத்தி'. விஜய், சமந்தா , சதீஷ் நடிக்கும் ’கத்தி’ படத்தைப் படு வேகமாக இயக்கிவருகிறார் ஏ.ஆர்.முருகதாஸ்.

இந்த வருட தீபாவளிக்கு 'கத்தி' படத்தை ரிலீஸ் செய்ய உள்ளார்கள். அதற்காக கத்தி படக்குழு பரபரப்பாக இயங்கிக் கொண்டிருக்கிறது.

படத்தில் மொத்தம் ஐந்து பாடல்கள். அதில் நான்கு பாடல்களுக்கு இசையமைத்துக் கொடுத்துவிட்டார் அனிருத்.மீதமிருக்கும் ஒரு பாடலை தனுஷ் எழுதுகிறார்.இந்தப் பாடலை விஜய் பாடப்போகிறார்.

அனிருத் இசையில், தனுஷ் எழுத்தில், விஜய் பாடும் பாடல் என்பதால் இப்பாடல்மீது அதிக எதிர்பார்ப்பு ஏற்பட்டுள்ளது

ரஜினி ஃபார்முலாவில் நயன்தாரா! இமயமலைப் பயணம்

இப்போ... தமிழ் சினிமாவின் குயின்... நயன்தாரா!

டாப் ஹீரோயின்களே பொறாமைகொள்ளும் 'ரீ என்ட்ரி ரெக்கார்டு’ கொடுத்துவிட்டு அலட்டிக்கொள்ளாமல் அமைதியாக இருக்கிறார். 'ராஜா ராணி’, 'ஆரம்பம்’, 'நீ எங்கே என் அன்பே’ என தமிழ், தெலுங்கு இரண்டு மொழிகளிலும் அடுத்தடுத்து ஹிட், இரண்டே படங்களில் இரண்டு மடங்கு எகிறிவிட்ட சம்பளம், 'நல்லா நடிச்சிருக்குல்ல பொண்ணு’ என விமர்சகர்களின் பாராட்டு, 'நம்ம படத்துக்கு நயனை ஃபிக்ஸ் பண்ணிடுங்க’ என ஹீரோக்களின் டிமாண்ட்... முன் எப்போதையும்விட உச்சத்தில் இருக்கிறது நயன்தாராவின் கிராஃப்.

ஆனால், 'இது ஏதோ நேற்று திட்டமிட்டு இன்று நடந்தது அல்ல. பிரபுதேவாவுடனான பிரிவுக்குப் பிறகு, 'மீண்டும் சினிமா’தான் என்று முடிவெடுத்தது முதல், ஒவ்வொரு நாளும் ஒவ்வொரு நிமிஷமும் அவராகத் திட்டமிட்டது’ என்கிறார்கள் அவரது நெருங்கிய நண்பர்கள். இதில் ஹீரோயின்களுடன் நட்பு, ரஜினி பாணியில் ஆன்மிக நாட்டம், சிம்புவுடன் மீண்டும் நடிப்பு, தேடித் தேடி 'ஹீரோயின் ஸ்கோப்’ கதை பிடிப்பது... எனப் பல வியூகங்கள் வகுத்துச் செயல்படுகிறாராம்.

சமீபத்தில் சென்னையில் ஒரு ஹோட்டலில் நடந்த த்ரிஷா பிறந்த நாள் கொண்டாட்டத்தில் நயன்தாராதான் 'ஷோ-ஸ்டாப்பர்’!

த்ரிஷா, தமன்னா, காஜல், அமலா பால் என ஹீரோயின்கள் மத்தியில் ஸ்டாராக ஜொலித்திருக்கிறார் நயன். ஆர்யா, சிம்பு குறித்த தோழிகளின் விசாரிப்புகளுக்கு நயன்தாராவிடம் 'ஸ்மைல்’ மட்டுமே பதில். ஆனால், 'காதல்’ குறித்து ஹீரோயின் தோழிகளுக்கு நயன் கொடுக்கும் டிப்ஸ்களில் அத்தனை முதிர்ச்சி. சக ஹீரோயின்களின் நல்லது-கெட்டதுகளை விசாரிப்பது, பிறந்த நாள்களுக்கு வாழ்த்துவது என நட்பு வட்டத்தை ஆரோக்கியமாகப் பராமரித்துக்கொள்கிறார்.

'இது நம்ம ஆளு’ படத்தில் சிம்புவுடன் 'வான்டெட்’ ஆக நடித்த நயன், அதன் பிறகு அவருடன் டச்சில் இல்லை. சிம்புவே முயன்றாலும்கூட நயன்தாரா 'நாட் ரீச்சபிள்’தான். இது குறித்துக் கேட்டால், ''படத்துல நடிக்கிறதோட நம்ம வேலை முடிஞ்சிருச்சு. அதுக்கு மேல என்ன இருக்கு?'' என்று சிம்பிளாக முடித்துக்கொள்கிறார்.

சமீபமாக 'நயன்தாரா, சிம்புவுடன் மீண்டும் பிரியம்’ என்று வரும் செய்திகளில் துளி உண்மை இல்லையாம். 'இது நம்ம ஆளு’ படத்தில் நடிக்க நயன் ஒப்புக்கொண்டதற்கு, அது இண்டஸ்ட்ரியில் உண்டாக்கும் பரபரப்பு மூலம் மைலேஜ் ஏற்றிக்கொள்ளலாம் என்பதே காரணம். அந்தப் படத்துக்கு அதுவரை வாங்காத சம்பளம் கேட்டது முதல், '25 நாள்கள் மட்டும் காலை 10 முதல் மாலை 6 மணி வரை நடிப்பேன். என்ன சாக்குச் சொன்னாலும் 26-வது நாள் வர மாட்டேன். நீங்கள் வேறு ஹீரோயினைக்கூட வைத்து படத்தை முடித்துக்கொள்ளுங்கள்’ என்றெல்லாம் ஏகப்பட்ட நிபந்தனைகள் விதித்திருக்கிறார். ஆக, அந்த புராஜெக்ட் மூலம் பணப் பலன் முதல் பப்ளிசிட்டி வரை 'மேக்ஸிமம் லாபம்’ பெற்றது நயன்தாராவே!

இன்னோர் ஆச்சரிய செய்தி...   நயன்தாராவின் ஆன்மிகப் பயணம் குறித்த தகவல்தான்.   சுவிட்ஸர்லாந்து, நியூஸிலாந்துகளில் படப்பிடிப்புக்காகச் சென்றாலும், அடிக்கடி இமயமலைப் பயணமும் மேற்கொள்கிறாராம் நயன். அதோடு வாரணாசிக்கும் அடிக்கடி பறந்து காசி விஸ்வநாதரை மனமுருகத் தரிசித்து வருகிறாராம். சென்னையில் படப்பிடிப்பு என்றால், நடை சாத்தப்படுவதற்குச் சற்று முன்னதாக மயிலாப்பூர் கபாலீஸ்வரரைத் தரிசித்துவிடுவாராம் நயன். இதில் இமயமலை விசிட் அடிக்கடி நிகழ்கிறது என்கிறார்கள் அவரது 'மூவ்மென்ட்’ அறிந்தவர்கள்.

கிறிஸ்தவரான 'டயானா மரியம் குரியன்’ என்ற நயன்தாரா, சில வருடங்களுக்கு முன்னரே சென்னையில் உள்ள ஓர் அமைப்பில் சேர்ந்து இந்து மதத்துக்கு மாறிவிட்டார். ஆனால், அப்போது எல்லாம் இல்லாத ஆன்மிக ஆர்வம், சமீப மாதங்களில் ஏகத்துக்கும் நயன்தாராவிடம் அதிகரித்திருக்கிறது. ஜெயம் ரவியுடன் நடிக்கும் படத்துக்காக உத்தரகாண்ட் சென்றிருந்தபோது, படப்பிடிப்பு இடைவேளைகளில் அமிர்தசரஸ் போன்ற கோயில் ஸ்தலங்களுக்குச் சென்று வந்திருக்கிறார்.

கிசுகிசுக்கள், சர்ச்சைகள்தான் ஒரு ஹீரோயினின் மார்கெட் வேல்யூவை நிர்ணயிக்கும் என்பதில் தெளிவாக இருக்கிறார் நயன்தாரா. ஆனால், சினிமா வட்டாரத்தில் யாரையும் முழுக்க நம்பாமல் இருப்பவர், தன் மன ஆறுதலுக்காக ஆன்மிகத்தில் நாட்டம்கொண்டிருக்கிறார். அது கொடுக்கும் புத்துணர்ச்சி தன் சினிமா கேரியருக்கும் அவசியம் என்று நினைக்கிறார். அடுத்து இந்திப் படம் ஒன்றில் நடிக்க ஒப்பந்தம் ஆகியிருப்பவருக்கு, இப்போதைய மார்க்கெட் ரேட்டைவிட 'ஒரு சி’ சம்பளம் அதிகம் என்று கேள்விப்படும்போது, நயன் பாலிசி நச் பாலிசி என்றே தோன்றுகிறது!

வெளிச்சத்துக்கு வருகிறது, வாழ்க்கை ரகசியங்கள்!


நடிகை பிரியங்கா சோப்ராவின் வாழ்க்கை சினிமாவாக உருவாகுவதாக ஒரு பரபரப்புத் தகவல் பாலிவுட்டில் உலா வருகிறது. அது உண்மையாக இருந்தால் அவரது வாழ்க்கை ரகசியங்கள் எல்லாம் வெளிச்சத்துக்கு வந்துவிடும். அப்படி வெளிச்சத்துக்கு வருவது அவரது பொதுவாழ்க்கைக்கு ஏற்றமாக இருக்குமா? இறக்கமாக இருக்குமா?

‘நடிகை அல்லவா, அவரது புகழுக்கான விஷயங்களை மட்டும் படத்தில் சேர்ப்பார்!’ என்று ரசிகர்கள் சொல்லாமல் சொல்வது ஒருபுறம் இருந்தாலும், இதுபற்றி பிரியங்கா சோப்ரா என்ன சொல்கிறார்?!

“என்னைப் பற்றி ஒரு சினிமா உருவாவதற்கு நான் தடை ஒன்றும் போடப்போவதில்லை. ஆனால் அது சரியான நேரத்தில் உருவாக்கப்பட வேண்டும்” என்கிறார்.

பிரியங்கா மாடலிங் துறையில் அடியெடுத்துவைத்து அழகுப்போட்டிகளில் பங்கேற்றவர். பின்பு அவரை இந்தி சினிமா வரவேற்றது. கதாநாயகியாக உச்சத்தில் இருக்கிறார். அவர் மாடலிங் செய்த காலத்தில் இருந்தே அஸீம் மெர்ச்சன்ட் என்பவர் அவருக்கு நண்பராக இருக்கிறார். பிரியங்காவின் வாழ்க்கை ரகசியங்கள் அனைத்தையும் அறிந்த அவர்தான் பிரியங்கா பற்றிய படத்தை உருவாக்கப் போகிறாராம்.

பிரபுதேவா இயக்கத்தில் சல்மான்கான் நடித்த ‘வான்டட்’ படத்தில் ஒரு சிறு வேடத்தில் நடித்த அஸீம், தற்போது தயாரிப்பாளர் அவதாரம் எடுக்கிறார்.

“என்னைப் பற்றி ஒரு படம் எடுக்குமளவு நான் பெரிய ஆளாகி விட்டேனா என்று நினைக்கும்போது எனக்கு சந்தோஷத்தில் தலை, கால் புரியவில்லை. சீரியசாக சொல்ல வேண்டுமென்றால், என்னைப் பற்றி படம் உருவாக்குமளவு நான் பெரிய ஆளில்லை” என்று அடக்கமாகச் சொல்கிறார் பிரியங்கா.

“அந்த படத்தை யார் தயாரிக்க போகிறார்கள் என்பதெல்லாம் உண்மையிலேயே எனக்குத் தெரியாது. நான் வாழ்க்கையில் இன்னும் நிறைய சாதிக்க வேண்டியிருக்கிறது. வேண்டுமானால், எனது 40 வயதில் என்னைப் பற்றி ஒரு படம் உருவாக்கலாம். காரணம், நான் அப்போது, சாதிக்க நினைத்தவற்றைச் சாதித்திருப்பேன்” என்கிறார்.

பிரியங்கா பற்றி உருவாகும் படத்தில், அவரது மாடலிங் நாட்கள், அவரது முன்னாள் மேலாளர் பிரகாஷ் ஜாஜுவுடன் அவர் நடத்திய சட்டப் போராட்டம் ஆகியவை முக்கிய இடம் பிடிக்கும் என்று தெரிகிறது. பிரியங்காவை ஏமாற்றியதற்காக பிரகாஷ், இரண்டு மாதங்களை சிறையில் கழித்தார் என்பது குறிப்பிடத்தக்கது. ஆனால் அவர், பிரியங்காதான் தனக்குப் பணம் கொடுக்க வேண்டும் என்று குற்றஞ்சாட்டினார். இருவரும் பரஸ்பரம் குற்றஞ்சாட்டியது பெரும் பரபரப்பை உருவாக்கியது.

‘அந்த விஷயங்களும் திரையில் இடம்பிடிக்கப் போகிறதாமே?’ என்று கேட்டால் பிரியங்காவின் முகம் சிவக்கிறது.

“என்னைப் பற்றி ஒருவர் சினிமா தயாரிக்கப் போகிறார் என்பது எனக்கு ரொம்ப மகிழ்ச்சி தரும் விஷயம். ஆனால் நீங்கள் இந்த கேள்வியை கேட்பது எனக்கு தாங்க முடியாத ஆத்திரத்தை ஏற்படுத்துகிறது. காரணம், அந்தப் பிரச்சினையின்போது நானும், எனது குடும்பத்தினரும் எவ்வளவு கஷ்டப்பட்டோம் என்பது எங்களுக்குத்தான் தெரியும். எனது வாழ்வின் வலி மிகுந்த ஒரு பகுதியை வெளிச்சமிட்டுக் காட்ட நினைப்பது எனக்கு வருத்தத்தை ஏற்படுத்துகிறது. மனரீதியாக அது ரொம்பவே தொந்தரவான விஷயம்” என்கிறார் படபடப்பாக.

தற்போது பிரியங்காவே ஒரு சுயசரிதைக் கதையில்தான் நடித்துக் கொண்டிருக்கிறார். அதாவது, உலக குத்துச்சண்டை சாம்பியன் மேரி கோமாக அவர் நடித்துக்கொண்டிருக்கிறார்.

“மேரி கோமின் நிஜவாழ்க்கைக் கதையில் நான் நடிக்கிறேன். அதன் ஒவ்வொரு காட்சி படம்பிடிக்கப்      படும்போதும் மேரி கோம் உடனிருந்து கவனிக்கிறார், குறிப்பிட்ட சூழல்களில் தனது உணர்வுகள் எப்படி இருந்தன என்று விளக்குகிறார். அது எனக்கு ரொம்பவே உதவியாக இருக்கிறது” என்று கூறி முடிக்கிறார், பிரியங்கா சோப்ரா.

இணையதளத்தில் படங்கள் வெளியீடு நடிகை சுருதிஹாசன் போலீசில் புகார்!


நடிகை சுருதிஹாசன் ‘யேவடு’ என்ற தெலுங்கு படத்தில் நடித்து வருகிறார். இதற்காக சில மாதங்களுக்கு முன்பு புகைப்படங்கள் எடுக்கப்பட்டன. இதில் சில படங்கள் தகாத கோணங்களில் எடுக்கப்பட்டதாக கூறப்படுகிறது. அந்த புகைப்படங்கள் எந்த அனுமதியும் இன்றி இணையதளங்களில் வெளியானது.

இதனை அறிந்த சுருதிஹாசன் அதிர்ச்சி அடைந்தார். இதுபற்றி நடிகை சுருதிஹாசன் போலீசில் புகார் செய்தார். இந்த புகார் சி.ஐ.டி. பிரிவு போலீசாருக்கு மாற்றப்பட்டு தீவிர விசாரணை நடந்து வருகிறது.

ஆக்‌ஷனில் கலக்கல் - கவர்ச்சியால் கலக்கம் - விஷால் தயக்கம்!


விஷால் தற்போது ஹரி இயக்கத்தில் ஸ்ருதிஹாசனுடன் ‘பூஜை’ படத்தில் நடித்து வருகிறார். தெலுங்கில் கவர்ச்சிப் புயலாக வலம் வரும் ஸ்ருதி இதிலும் கவர்ச்சியில் தாராளம் காட்டியுள்ளாராம். தமிழில் சூர்யாவுடன் ‘ஏழாம் அறிவு’ படத்துக்குப் பிறகு ‘பூஜை’ படத்தில் விஷாலுடன் நடிக்கிறார் ஸ்ருதி.

அர்ஜூன் மகள் ஐஸ்வர்யாவுடன் ‘பட்டத்து யானை’ படத்தில் நடித்தார் விஷால். அப்போது பேசிய விஷால், 'அர்ஜூனிடம் நான் உதவி இயக்குனராக இருந்ததால், அவரை என் குருவாகத்தான் பார்க்கிறேன். குருவின் மகளோடு நெருங்கி நடிப்பதும், டூயட் பாடுவதும் ஒரு வித பயத்தையே கொடுக்கிறது’ என்றார்.

அடுத்து சரத்குமார் மகள் வரலட்சுமியோடு ‘மதகஜ ராஜா’ படத்தில் ஜோடி போட்டு நடித்தார் விஷால். அப்போதும் விஷாலுக்கு இதே தயக்கம் இருந்தது. இப்படி சீனியர் நடிகர்களின் மகள்களோடு ஜோடி போடும் விஷால், தொடர்ந்து தனக்கு இருக்கும் தயக்கத்தையே வெளிப்படுத்தி வருகிறார். அடுத்து கமல் மகள் ஸ்ருதியுடனும் நெருக்கம் காட்டி நடிக்கும் காட்சிகளில் இதே காரணத்தை சொல்கிறாராம் விஷால்.

காதல் காட்சிகளில் மட்டும் தான் இந்த தயக்கமே தவிர, ஆக்‌ஷன் காட்சிகளில் பட்டையைக் கிளப்புகிறாராம் விஷால். ‘சத்யம்’ படத்திற்குப் பிறகு இதில் போலிஸ் அதிகாரியாக நடிக்கும் விஷால் உண்மையான என்கவுண்டர் ஸ்பெஷலிட்டுகளை நேரில் சந்தித்து அவர்களின் அனுபவங்களை அறிந்துகொண்டு படத்தில் நடித்து வருகிறார் என்று தகவல்கள் தெரிவிக்கின்றன.

போலிஸ் கதையை விறுவிறுப்பாக எடுக்க ‘சிங்கம்’ இயக்குனர் ஹரிக்கு சொல்லியாத் தரவேண்டும்!

ரஜினிக்கு மட்டும் சம்மதமா? நயன்தாராவின் பதில்...


பொதுவாகவே நடிகைகளைப் பொருத்த வரை படவாய்ப்புகள் இல்லாத நிலையில் தான் ஒரு பாடலுக்கு நடனமான முன்வருவார்கள். ஆனால், நயன்தாரா தன் ஆரம்ப காலத்திலேயே ஒரு பாடலுக்கு ஆடியவர்.

சந்திரமுகி படத்தில் ரஜினிக்கு ஜோடியாக நடித்து பிரபலமான சூழ்நிலையில் ‘நான் சூப்பர்ஸ்டாரு ஜோடி தான், கூட ஆடுடா’ என்று விஜய்யுடன் சிவகாசி படத்தில் ஒரு பாடலுக்கு ஆடினார் நயன்தாரா.

அதிக படங்களில் நடித்து தமிழ், மலையாளம், தெலுங்கு என மூன்று மொழிகளிலும் முதலிடத்தில் இருந்தாலும் சிவாஜி படத்தில் ‘பல்லேலக்கா...’ பாடலுக்கு நடனம் ஆடினார். தனிப்பட்ட வாழ்க்கையில் சில கசப்புகள் ஏற்பட்டு சிறிய இடைவெளிக்கு பிறகு மீண்டும் திரைக்கு வந்த நயன்தாரா, எதிர்நீச்சல் படத்தில் தனுஷுடன் சேர்ந்து ஒரு பாடலுக்கு ஆடினார். அதே சமயம் சூர்யாவுடன் சிங்கம் படத்தில் நடனமாட அழைத்தபோது அதை மறுத்துவிட்டார் நயன்.

இப்போது மீண்டும் கே.எஸ்.ரவிக்குமார் இயக்கத்தில் ரஜினி நடிக்கும் ‘லிங்கா’ படத்தில் ஒரு பாடலுக்கு ஆட சம்மதம் தெரிவித்துள்ளார் நயன். இது பற்றி நயன்தாராவிடம் கேட்டபோது ‘ரஜினி ஒரு சூப்பர்ஸ்டார், அதனால் தான் அவருடன் ஆட நான் சம்மதிக்கிறேன், மற்றபடி அதில் எந்த ரகசியமும் இல்லை’ என்றார்.  

லிங்கா படத்தில் ரஜினியுடன் இந்தி நடிகை சோனாக்‌ஷி சின்ஹா மற்றும் அனுஷ்கா ஹீரோயின்களாக நடிக்கிறார்கள்.

இந்திய கலைஞர்கள் உலக அரங்கிற்கு வர வேண்டும்: கேன்ஸ் திரைப்பட விழாவில் கமல் பேச்சு


பிரான்ஸ் நாட்டில் உள்ள கேன்ஸ் நகரில் சர்வதேச திரைப்பட விழா கடந்த 14ந் தேதி தொடங்கியது. வருகிற 25ந் தேதி வரை நடக்கிறது. இங்கு இந்திய அரசும், இந்திய பிக்கி அமைப்பும் இணைந்து அரங்கம் அமைத்துள்ளன. இதனை பிக்கி அமைப்பின் மீடியாப் பிரிவு தலைவரான கமல்ஹாசன் திறந்து வைத்தார்.

பின்னர் அங்கு வந்திருந்த இந்திய பிரிதிநிதிகளிடையே அவர் பேசியதாவது: சர்வதேச திரைப்பட விழாவில் இந்தியாவின் பிரதிநிதித்துவம் இருப்பது பாராட்டுக்குரியது. இதன் மூலம் இந்திய சினிமா வர்த்தகத்தை, உலக சினிமாவுடன் ஒருங்கிணைக்க முடியும். இதுபோன்ற விழாக்களுக்கு தனியாக வர முடியாத கலைஞர்கள், இந்த அமைப்புடன் இணைந்து கலந்து கொண்டு உலக சினிமா பிரபலங்களை சந்தித்து உரையாடலாம்.

அதேபோல இந்தியாவில் கொட்டிக் கிடக்கும் திறமைகள் உலக சினிமா பயன்படுத்திக் கொள்ள ஒரு வாய்ப்பாகவும் இது அமையும். இந்திய கலைஞர்களின் பிரச்னையே அவர்கள் சின்ன சின்ன சாதனைகளுக்குகூட தன்னிறைவு பெற்று விடுவதுதான். அதிலேயே முழு திருப்தி அடைந்துவிடுகின்றனர். அதனால் சர்வதேச சந்தைகளின் அறிமுகம்கூட அவர்களுக்கு இல்லாமல் போகிறது. சர்வதேச சந்தை குறித்த பயம்தான் நம்மிடம் உள்ளது. இந்திய கலைஞர்கள் உலக அளவில் பாராட்டப்படுகிறார்கள். அது அவர்களுக்கு தெரியவில்லை. தங்களிடம் இருக்கும் திறமையை உணர்ந்து இந்திய படைப்பாளர்கள் உலக அரங்கிற்கு வரவேண்டும், உலக சினிமாவில் ஜொலிக்க வேண்டும்.

இவ்வாறு கமல் பேசினார்.